SAMI BOROCI RIKTHEHET TEK PRISHTINA E RE

KF Prishtina e Re ka kënaqësinë të njoftojë rikthimin e Sami Boroci në klub, në rolin e Drejtorit Menaxhues dhe Sportiv.

Si njëri nga themeluesit e klubit dhe një nga figurat kyçe në rrugëtimin historik të tij, Sami Boroci ishte pjesë e projektit që, brenda vetëm pesë viteve (2020–2025), e ngriti KF Prishtinën e Re nga rangu më i ulët i futbollit kosovar deri në elitën e futbollit të Kosovës.

Fal vizionit dhe udhëheqjes nga Samiu, KF Prishtina e Re përveç suksesit të madh sportiv u bë shembull i vizionit dhe profesionalizmit në futbollin kosovar.

Tani, Boroci rikthehet pas një aventure njëvjeçare te FC Malisheva, ku kontribuoi në një sezon historik, duke ndihmuar klubin të shpallet nënkampion i Albi Mall Superligës.

Me rikthimin e tij, KF Prishtina e Re synon të ndërtojë një projekt afatgjatë dhe ambicioz.

Objektivi kryesor është rikthimi dhe konsolidimi i klubit në elitën e futbollit të Kosovës, ndërsa prioritet strategjik do të mbetet zhvillimi i akademisë dhe krijimi i një modeli të qëndrueshëm për zhvillimin e futbollistëve të rinj që është krucial për një klub sportiv.

Mirë se u riktheve në shtëpi, Sami!